Wednesday, April 8, 2015

නීලාවරෙයි පොකුණ

පතුල නොපෙනෙන නීලවරයි ලිඳ -  පුත්තුර්

යාල්පානම් ගොස් මන්නාරම්තොටෙන් කොළොම්තොටට පැමිණියෙමි....

සරු යාල්පානම් පොළවේ හොඳ හැටි පල දරා ඇති කෙසෙල්, පැපොල්, මිරිස් සහ මිදි‍ ආදී වගාවන් අතරින් ඊළගට ළගා වූයේ නිලාවර හෙවත් පතුළ නොපෙනෙන ළිඳ වෙතටය. 



නීලාවරෙයි පොකුණ හා නටඹුන් පිහිටලා තියෙන්නේ වලිකාමම් නැඟෙනහිර ප්‍රාදේශීය ලේකම් කොට්ඨාසයේ නීලවරෙයි හන්දියේ. මේ පොකුණ ජනතාව අතර ප්‍රසිද්ධ වෙලා තියෙන්නේ පතුළ නැති ළිඳ කියලයි. මෙහි ගැඹුර මනින්න උත්සහ කළත් එය කළ නොහැකි බවයි පුරා විද්‍යාඥයන්ගේ මතය. භූගත ගංඟාවක් හේතුකොටගෙන මතුපිට පස්තට්ටුව කඩා වැටීමෙන් මේ පොකුණ බිහිවන්නට ඇතැයි මතයක් පවතිනවා. 2007 සිට මේ ළිඳ වටේ බැම්මක් බැඳ ඇති අතර ජලාපවහන මණ්ඩලය මඟින් නගරයේ පානීය ජල අවශ්‍යතාවය සඳහා දිනකට ජලය ලීටර් 174000 ප්‍රමාණයක් මේ ළිඳෙන් ලබාගෙන තියෙනවා. 

බොහෝ පුරාවෘත වලට විවෘත වූ මෙම ළිඳ සැබැවින්ම ගුප්ත ස්වභාවයක් ඉසිලීය. මෙම ළිඳෙහි ගැඹුර අද වන තුරු සොයා ගෙන නැති අතර එනිසාම මෙය පතුළක් නැති ළිඳ ලෙසින් හැඳින්වේ. මෙම ළිඳ තුළ විවරයන් දෙකක් පවතින අතර ඒවා ත්‍රිකුණාමලය සහ කීරමලේ දක්වා දි‍වෙන බවටද මතයක් ඇත. කෙසේ වුවත් මෙම ළිඳ තවමත් හරියට තෝරා බේරා නොමැති ප්‍ර‍හේලිකාවක් සේය. එය විසඳන්නට එක්කෝ කෙනෙකු අතිශය නිර්භය විය යුතුය නොඑසේනම් පතුළක් නැතැයි පිළිගන්නා ළිඳකට පැන පතුළ සොයා කිමිදෙන්නට තරම් ජීවිතාශාව අත් හැරි කෙනෙකු විය යුතුය. මේ සම්බන්ධයෙන් ඇති තවත් එක් විශ්වාසයක් වන්නේ මෙය හදි‍සියේ ගැසූ අකුණක් හේතුවෙන් පහළ වූවා යන්නයි. මෙවන් මිත්‍ය විශ්වාසයන්ගේ අතීත කතාන්දර වල ඇති නිර්මාණශීලීත්වය සහ අවස්ථා ගැළපීමම මොනතරම් අගය කළ යුතුද ? 

UPDATE 10/04/2015